കേരളത്തിൽ വൈശ്യരുണ്ടായിരുന്നോ ?

കേരളത്തിൽ വൈശ്യരുണ്ടായിരുന്നോ ?
------------------------------------------------------------

ബ്രാഹ്മണർ, ക്ഷത്രിയർ, വൈശ്യർ, ശൂദ്രർ, അവർണർ അഥവാ ചാതുർ വർണ്യത്തിനും പുറത്തുള്ളവർ.... ഇന്ത്യയിലെ ജാതി സമ്പ്രദായം അനുസരിച്ചു നില നിന്നിരുന്ന വിവിധ വിഭാഗങ്ങൾ ഇവയായിരുന്നു. പക്ഷെ കേരളത്തിൽ പ്രധാനമായും നില നിന്നിരുന്നത് ബ്രാഹ്മണരും,ചില ക്ഷത്രിയ രാജവംശങ്ങളും, പിന്നെ നായന്മാർ ഉൾപ്പെടുന്ന ശൂദ്ര വിഭാഗങ്ങളും, വർണ്ണമില്ലാത്ത അവർണ വിഭാഗങ്ങളും മാത്രമായിരുന്നു.

കേരളത്തിൽ ക്ഷത്രിയ രാജാക്കന്മാർ ഉണ്ടായിരുന്നുവെങ്കിലും വിരളമായിരുന്നു.അവരിൽ പലരെയും ക്ഷത്രിയന്മാരായി ബ്രാഹ്മണർ അംഗീകരിച്ചിട്ടുമുണ്ടായിരുന്നില്ല. അതായത് ബ്രാഹ്‌മണ വിശ്വാസപ്രകാരം ക്ഷത്രിയ നിഗ്രഹം പൂർത്തിയാക്കിയ ശേഷമാണ് പരശുരാമൻ ബ്രാഹ്മണരെ കേരളത്തിൽ കുടിയിരുത്തിയത്. അതിനാൽ തന്നെ ക്ഷത്രിയർക്ക് വംശനാശം സംഭവിച്ചു എന്ന ധാരണ വെച്ച് പുലർത്തിയിരുന്നവരായിരുന്നു ബ്രാഹ്മണർ. ഇത് കൂടാതെ കേരളത്തിലെ പല രാജാക്കന്മാരും, സാമന്തന്മാരും നായർ സമുദായത്തിൽ നിന്നുമുള്ളവരായിരുന്നു. സാമൂതിരിയും, വേണാട്ടടികളും, കോലത്തിരിയും എല്ലാം ഇതിൽ ഉൾപ്പെടുന്നു.

പോസ്റ്റിൽ പറയാൻ ഉദ്ദേശിക്കുന്നത് വൈശ്യരെക്കുറിച്ചാണ്. കേരളത്തിൽ വൈശ്യ വിഭാഗം തീരെ ഇല്ല എന്നാണ് പൊതുവെയുള്ള ധാരണ. കാരണം ബ്രാഹ്‌മണ -ക്ഷത്രിയ, അമ്പലവാസികളും, നായന്മാരും, ഈഴവരുൾപ്പെടുന്ന അവര്ണരുമായിരുന്നു കേരള ജനത. ഇവർക്കെല്ലാം കുലത്തൊഴിലുകളും ഉണ്ടായിരുന്നു. അമ്പലവാസികൾ അമ്പലത്തെ ചുറ്റിപറ്റി ഉപജീവനം കഴിച്ചവരായിരുന്നു. വാര്യരും,മാരാരും എല്ലാം അമ്പലവാസികളിൽ ഉൾപ്പെടുന്നു. പിന്നെയുള്ള ഭൂരിപക്ഷമായിരുന്ന നായർ വിഭാഗം ഒന്നിലധികം തൊഴിലുകളിൽ വ്യാപൃതരായിരുന്നു. പട നായന്മാർ പടയാളികളും, രാജ്യത്തെ സൈന്യത്തിൽ സേവനമനുഷ്ഠിക്കുന്നവരുമായിരുന്നു. ഇതല്ലാത്തവർ കളരി അഥവാ മേയ്ക്കളരി ഗുരുക്കന്മാരായിരുന്നു. ഏഴുശൻ എന്ന് വിളിക്കപ്പെട്ടിരുന്ന എഴുത്തച്ഛന്മാർ എഴുത്തുകളരി വാധ്യാന്മാരായിരുന്നു(അടിസ്ഥാന ശാസ്ത്രവും, ഗണിതവും, അല്പം വേദാന്തവുമായിരുന്നു എഴുത്തു കളരികളിൽ പാഠ്യവിഷയം ).ബാക്കിയുള്ള നായന്മാർ നമ്പൂതിരി ഇല്ലങ്ങളിൽ കാര്യസ്ഥന്മാർ അടക്കമുള്ള സേവനങ്ങൾ അനുഷ്ഠിച്ചിരുന്നു. നായന്മാരിൽ തന്നെയുള്ള താഴ്ന്ന വിഭാഗങ്ങൾക്കുമുണ്ടായിരുന്നു കുലത്തൊഴിലുകൾ. ചക്കാലക്കൽ നായന്മാർക്ക് ചാക്കാട്ടി എണ്ണ ഉത്പാദിപ്പിക്കുക, വെളുത്തേടൻമാർക് വസ്ത്രങ്ങൾ അലക്കുക പോലുള്ളവ. ഈഴവ -തിയ്യ വിഭാഗം തെങ്ങുമായി ബന്ധപ്പെട്ടു ഉപജീവനം കണ്ടെത്തി. ദളിതർ മണ്ണിൽ പണിയെടുത്തു. കൊല്ലന്മാർ -ആശാരി -പൂശാരി അടക്കമുള്ള വിശ്വകർമ്മജർ അവരുടെ വേലകൾ ചെയ്തു. ഇതായിരുന്നു വർണ -തൊഴിൽ ക്രമം.

പറഞ്ഞു വന്നത് വൈശ്യന്മാരെക്കുറിച്ചാണ്. ഈ വിഭാഗത്തിൽ ഒന്നിലും കച്ചവടം തൊഴിലാക്കിയവർ ഇല്ല. പക്ഷെ അങ്ങനൊരു വിഭാഗം കേരളത്തിൽ ഉണ്ടായിരുന്നില്ലേ ?

ചെട്ടിയാർ എന്നൊരു വിഭാഗമുണ്ട് കേരളത്തിൽ. വാണിയർ എന്നും ഇവർ അറിയപ്പെടാറുണ്ട്. ജാതീയമായി നോക്കുമ്പോൾ നായർ സ്റ്റാറ്റസ് ഉള്ള സമുദായമായിരുന്നു വാണിയർ. ഇവർ പാരമ്പര്യമായി കച്ചവടക്കാരാണ്. കാലിക്കച്ചവടം മുതൽ എണ്ണ -ഗൗളി കച്ചവടങ്ങൾ വരെ ചെയ്തിരുന്ന വർ ചെട്ടിയാർ വിഭാഗത്തിൽ നിന്നുണ്ടായിട്ടുണ്ട്..ഇന്നും കേരളത്തിലെ പല പ്രമുഖ വസ്ത്രവ്യാപാര സ്ഥാപനങ്ങളും ചെട്ടിയാർ സമുദായാംഗങ്ങളുടേതാണ്.

മറ്റൊരു വിഭഗമാണ് ശാലിയ.തുണി നെയ്താണ് കുലത്തൊഴിലെങ്കിലും പുരാതന കാലത്തു വസ്ത്രവ്യാപാരികൾ പലരും ശാലിയ സമുദായക്കാരായിരുന്നു.

ഇവരല്ലാതെ കച്ചവടം ഉപജീവനമാക്കിയ വിഭാഗങ്ങൾ കേരളത്തിലുണ്ടായിരുന്നോ ?